suna hai log use aankh bhar ke dekhte hai

suna hai log use aankh bhar ke dekhte hai
so us ke shahr mein kuch din thahar ke dekhte hai 

suna hai rabt hai us ko kharab-halon se
so apne aap ko barbad kar ke dekhte hai

suna hai dard ki gahak hai chashm-e-naaz uski
so hum bhi uski gali se guzar ke dekhte hai

suna hai us ko bhi hai sher o shayeri se shaghaf
so hum bhi moajize apne hunar ke dekhte hai

suna hai bole to baton se phuul jhadte hai
ye baat hai to chalo baat kar ke dekhte hai

suna hai raat use chaand takta rehta hai
sitare bam-e-falak se utar ke dekhte hai

suna hai din ko use titliyan satati hai
suna hai raat ko jugnu thehar ke dekhte hai

suna hai hashr hai us ki ghazal si ankhein
suna hai usko hiran dasht bhar ke dekhte hai

suna hai raat se badh kar hai kakulein uski
suna hai shaam ko saaye guzar ke dekhte hai

suna hai uski siyah-chashmagi qayamat hai
so usko surma-farosh aah bhar ke dekhte hai

suna hai us ke labon se gulab jalte hai
so hum bahaar pe ilzaam dhar ke dekhte hai

suna hai aaina timsal hai jabeen uski
jo saada dil hai use ban-sanwar ke dekhte hai

suna hai jab se hamail hai uski gardan mein
mizaj aur hi laal o guhar ke dekhte hai

suna hai uske badan ki tarash aise hai
ki phuul apni qabaein katar ke dekhte hai

vo sarv-qad hai magar be-gul-e-murad nahi
ki us shajar pe shagufe samar ke dekhte hai

bas ek nigah se lutta hai qafila dil ka
so rah-ravan-e-tamanna bhi dar ke dekhte hai

suna hai uske shabistan se muttasil hai bahisht
makeen udhar ke bhi jalwe idhar ke dekhte hai

ruke to gardishe uska tawaf karti hai
chale to usko zamane thahar ke dekhte hai

kise naseeb ki be-pairahan use dekhe
kabhi kabhi dar o dewaar ghar ke dekhte hai

kahaniyan he sahi sab mubalghe he sahi
agar vo khwab hai tabir karke dekhte hai

ab uske shahr mein thahrein ki kuch kar jaaye
‘farāz’ aao sitare safar ke dekhte hai 

Leave a Reply

Your email address will not be published. Required fields are marked *