su-e-falak na jaanib-e-mahtab dekhna

su-e-falak na jaanib-e-mahtab dekhna
is shahr-e-dil-nawaz ke aadab dekhna

tujhko kahan chupayen ki dil par giraft ho
aankhon ko kya karen ki wahi khwab dekhna

wo mauj-e-khun uthi hai ki deewar-o-dar kahan
ab ke fasil-e-shahr ko gharqab dekhna

in suraton ko tarsegi chashm-e-jahan ki aaj
kamyab hain to kal hamein nayab dekhna

phir khun-e-khalq o gardan-e-mina bachaiyo
par chal pada hai zikr-e-mai-e-nab dekhna

aabaad ku-e-chaak-e-gareban jo phir hua
dast-e-raqib o daman-e-ahbab dekhna

hum le to aae hain tujhe ek be-dili ke sath
is anjuman mein ai dil-e-betab dekhna

had chahiye ‘faraaz’ wafa mein bhi aur tumhein
ghum dekhna na dil ki tab-o-tab dekhna

Leave a Reply

Your email address will not be published. Required fields are marked *