is se pehle ki be-wafa ho jayen

is se pehle ki be-wafa ho jayen
kyun na aye dost hum juda ho jayen

tu bhi heere se ban gaya patthar
hum bhi kal jaane kya se kya ho jayen

tu ki yakta tha be-shumar hua
hum bhi tuten to ja-ba-ja ho jayen

hum bhi majburiyon ka uzr karen
phir kahin aur mubtala ho jayen

hum agar manzilen na ban paye
manzilon tak ka rasta ho jayen

der se soch mein hain parwane
rakh ho jayen ya hawa ho jayen

ishq bhi khel hai nasibon ka
khak ho jayen kimiya ho jayen

ab ke gar tu mile to hum tujhse
aise liptein teri qaba ho jayen

bandagi hum ne chodh di hai ‘faraaz’
kya karen log jab khuda ho jayen

Leave a Reply

Your email address will not be published. Required fields are marked *