hum par tumhaari chah ka ilzam hi to hai

hum par tumhaari chah ka ilzam hi to hai
dushnam to nahin hai ye ikram hi to hai

karte hain jis pe tan koi jurm to nahin
shauq-e-fuzul o ulfat-e-nakaam hi to hai

dil muddai ke harf-e-malamat se shad hai
ai jaan-e-jaan ye harf tera nam hi to hai

dil na-umid to nahin nakaam hi to hai
lambi hai gham ki sham magar sham hi to hai

dast-e-falak mein gardish-e-taqdir to nahin
dast-e-falak mein gardish-e-ayyam hi to hai

aaKHir to ek roz karegi nazar wafa
wo yar-e-KHush-KHisal sar-e-baam hi to hai

bhigi hai raat ‘faiz’ ghazal ibtida karo
waqt-e-sarod dard ka hangam hi to hai

Leave a Reply

Your email address will not be published. Required fields are marked *