hum bhi shair the kabhi jaan-e-sukhan yaad nahi

hum bhi shair the kabhi jaan-e-sukhan yaad nahi
tujhko bhule hain to dil-dari-e-fan yaad nahi

dil se kal mahw-e-takallum the to malum hua
koi kakul koi lab koi dahan yaad nahi

aql ke shahr mein aaya hai to yun gum hai junun
lab-e-goya ko bhi be-sakhta-pan yaad nahi

awwal awwal to na the waqif-e-adab-e-qafas
aur ab rasm-o-rah-e-ahl-e-chaman yaad nahi

har koi nawak o tarkash ki dukan puchta hai
kisi gahak ko magar apna badan yaad nahi

waqt kis dasht-e-faramoshi mein le aaya hai
ab tera naam bhi khakam-ba-dahan yaad nahin

ye bhi kya kum hai gharib-ul-watani mein ki ‘faraaz’
hum ko be-mehri-e-arbab-e-watan yaad nahi

Leave a Reply

Your email address will not be published. Required fields are marked *