har aashna mein kahan khu-e-mehrmana wo

har aashna mein kahan khu-e-mehrmana wo
ki bewafa tha magar dost tha purana wo

pukarte hain mah-o-sal manzilon ki tarah
laga hai tausn-e-hasti ko taziyana wo

hume bhi ghum-talabi ka nahin raha yara
tere bhi rang nahin gardish-e-zamaana wo

ab apni khwahishen kya kya use rulati hain
ye baat humne kahi thi magar na mana wo

yahi kahenge ki bas surat-ashnai thi
jo ahd tut chuka yaad kya dilana wo

is ek shakl mein kya kya na suraten dekhin
nigar tha nazar aaya nigar-khana wo

bujha diya hai tujhe bhi ‘faraaz’ duniya ne
kahan gaya tera har waqt muskurana wo

Leave a Reply

Your email address will not be published. Required fields are marked *