apne sab yaar kaam kar rahe haiñ

apne sab yaar kaam kar rahe haiñ
aur ham haiñ ki naam kar rahe haiñ

tegh-bazi ka shauq apni jagah
aap to qatl-e-am kar rahe haiñ

dad-o-tahsin ka ye shor hai kyuuñ
ham to ?hud se kalam kar rahe haiñ

ham haiñ masruf-e-intizam magar
jaane kya intizam kar rahe haiñ

hai vo bechargi ka haal ki ham
har kisi ko salam kar rahe haiñ

ek qattala chahiye ham ko
ham ye e.alan-e-am kar rahe haiñ

kya bhala saghar-e-sifal ki ham
naf-pyale ko jaam kar rahe haiñ

ham to aa.e the arz-e-matlab ko
aur vo ehtiram kar rahe haiñ

na uThe aah ka dhuañ bhi ki vo
ku-e-dil meñ ?hiram kar rahe haiñ

us ke hoñToñ pe rakh ke hoñT apne
baat hi ham tamam kar rahe haiñ

ham ajab haiñ ki us ke kuche meñ
be-sabab dhum-dham kar rahe haiñ

Leave a Reply

Your email address will not be published. Required fields are marked *