aap ki yaad aati rahi raat bhar chandni dil dukhati rahi raat bhar

aap ki yaad aati rahi raat bhar
chandni dil dukhati rahi raat bhar

gah jalti hui gah bujhti hui
sham-e-ghum jhil-milati rahi raat bhar

koi khushbu badalti rahi pairahan
koi tasweer gaati rahi raat bhar

phir saba saaya-e-shaakh-e-gul ke tale
koi qissa sunati rahi raat bhar

jo na aaya usse koi zanjeer-e-dar
har sada par bulati rahi raat bhar

ek umeed se dil behalta raha
ek tamanna satati rahi raat bhar

Faiz Ahmad Faiz

Leave a Reply

Your email address will not be published. Required fields are marked *