abhi ek shor sa utha hai kahin
koi khamosh ho gaya hai kahin

hai kuch eisa ki jaise ye sab kuch
is se pehle bhi ho chuka hai kahin

tujhko kya ho gaya ki cheezon ko
kahin rakhta hai dhundhta hai kahin

jo yahan se kahin na jata tha
wo yahan se chala gaya hai kahin

aaj shamshaan ki si bu hai yahan
kya koi jism jal raha hai kahin

hum kisi ke nahi jahan ke siwa
eisi wo khaas baat kya hai kahin

tu mujhe dhund main tujhe dhundun
koi hum mein se reh gaya hai kahin

kitni wehshat hai darmiyan-e-hujum
jisko dekho gaya hua hai kahin

main to ab shehr mein kahin bhi nahin
kya mera naam bhi likha hai kahin

isi kamre se koi ho ke widaa
isi kamre mein chhup gaya hai kahin

mil ke har shakhs se hua mehsus
mujhse ye shakhs mil chuka hai kahin

Leave a Reply

Close Menu